Uzinduzi wa zoezi la ugawaji wa vitambulisho kwa wajasiliamali

Imewekwa: January 1st, 2019

Mkuu wa Wilaya ya Bukombe Mhe. Said Nkumba tarehe 31 Disemba, 2018 amezindua rasmi zoezi la ugawaji wa vitambulisho kwa wajasiliamali wadogo wadogo lengo likiwa ni kuwapunguzia kero ya kusumbuliwa kulipa ushuru ili waweze kufanya shughuli zao bila bughudha yoyote.

“Vitambulishi hivi vimetolewa na Rais wa Jamhuri ya Muungano wa Tanzania Mhe. Joseph Pombe Magufuli kwa wafanyabiashara wote wadogo wadogo ambao mauzo yao hayazidi Tsh 4,000,000.00 kwa mwaka na kwa mwezi Tsh 11,000.00” Mhe. Nkumba aliyasema hayo wakati akiongea na wafanyabiashara wa kata ya Katente kitongoji cha Majengo siku hiyo ya uzinduzi wa vitambulisho hivyo.

Mhe. Nkumba alisema kuwa wafanyabiashara wanaopewa vitambulisho ni wale ambao hawajasajiliwa na TRA. “Wafanyabiashara wanaopewa vitambulisho ni wale ambao kwa namna moja au nyingine hawajapata usajili wa kulipa kodi kutoka Mamlaka ya Mapato Tanzania (TRA) na ni fulsa kwenu kuchangamkia hii tenda mapema”

Naye Diwani wa kata ya Katente Mhe.Bahati Kayagila amewataka wafanyabiashara hao kujitokeze kwa wingi kwa ajili ya kupatiwa vitambulisho hivyo ili wasije kulaumu baadaye wakati zoezi limekwisha kuwa wamesahaulika.

Kwa upande wake mfanyabiashara mdogo Ndg. Anna Yohana Masinga amempongeza Rais wa Jamhuri ya Muungano wa Tanzania Mhe. John Pombe Magufuli kwa kuchukua jukumu la kuwapatia vitambulisho.

Halmashauri ya Wilaya ya Bukombe imepokea jumla ya vitambulisho 5,000 vitakavyogawiwa kwa wafanyabiashara wadogo wadogo kama wachimbaji wa madini wenye vipato vidogo, bodaboda, waendesha baskeli (daladala), mama lishe, wamachinga, vikundi vya wafanyabiashara na mafundi wadogo wadogo.