CHANJO NA UTAMBUZI WA MIFUGO KUWANUFAISHA WAFUGAJI- DKT. KIJAJI.

Imewekwa: July 7th, 2025

Waziri wa Mifugo na Uvuvi Mhe. Dkt. Ashatu Kijaji amewataka wafugaji kupeleka mifugo yao kupata Chanjo na kufanyiwa Utambuzi ili kuongeza thamani ya mifugo na kutanua wigo wa masoko ndani na nje ya nchi.

Rai hiyo ameitoa Julai 06, 2025 wakati wa Ziara yake ya ukaguzi wa utekelezaji wa kampeni hiyo katika Kijiji cha Kazibizyo Kata ya Ng’anzo Wilayani Bukombe ambapo amewasisitiza wafugaji kupeleka mifugo yao kwa wingi ili waweze kunufaika na huduma hiyo muhimu.

“Ili mifugo iwe na thamani pamoja na ubora wa kimataifa ni lazima ichanjwe dhidi ya magonjwa, kuoshwa na kutibiwa, hii itaondoa umasikini kwa wafugaji na taifa kwa ujumla”.

Aidha Dkt. Kijaji amesema kuwa zoezi la utambuzi wa mifugo litawasaidia wafugaji kuondokana na changamoto ya wizi wa mifugo yao kwani kila mfugo utatambuliwa na namba maalum zinazopatikana kwenye hereni za kielektroniki.

Kwa upande wake Mkuu wa Mkoa wa Geita Mhe. Martine Shigela ameipongeza Wizara na Serikali kwa kuwawezesha wataalam wa mifugo kupata vitendea kazi vinavyowawezesha kutekeleza majukumu yao kwa urahisi.

“Sisi kama mkoa tutahakikisha tunasimamia utekelezaji wa zoezi hili na tutafanikisha kuchanja zaidi ya asilimia 70 ya mifugo yote ndani ya miezi miwili ya kampeni hii” alisema Shigela.

Kampeni hii ya Kitaifa ya Chanjo kwa mifugo ilizinduliwa rasmi na Rais wa Jamhuri ya Muungano wa Tanzania Mhe. Samia Suluhu Hassan Juni 16, 2025 Mkoani Simiyu.