DAS MKETO AHIMIZA WANANCHI KUJIANDIKISHA KWENYE ORODHA YA WAPIGA KURA

Imewekwa: October 9th, 2024

Katibu Tawala wa Wilaya ya Bukombe Ndg. Ally Mketo ametoa wito kwa Wananchi wa Kata ya Busonzo kujitokeza kwa wingi kujiandikisha kwenye orodha ya wapiga Kura kuanzia tarehe 11 hadi 20 Oktoba, 2024 ili waweze kuchagua viongozi wa Vijiji na Vitongoji.

Wito huo ameutoa tarehe 09 Oktoba, 2024 wakati akizungumza na wazazi na wanafunzi kwenye Mahafali ya tatu ya kidato cha nne yaliyofanyika katika viwanja vya Shule ya Sekondari Busonzo ambapo wanafunzi 58 wamehitimu.

Mketo amewataka Wananchi wote wenye sifa kwenda kujiandikisha katika Uchaguzi wa Serikali za Mitaa ili waweze kutumia haki yao ya Kikatiba ya kuchagua Viongozi bora watakaoleta maendeleo.

“Nendeni mkajiandikishe kwenye Orodha ya Wapiga Kura katika Vijiji na Vitongoji vyenu kwani ili muweze kupiga Kura ni lazima muwe mmejiandikisha katika Kitongoji husika”.

Mbali na hilo Mketo amewataka wahitimu wa kidato cha nne kuwa mfano bora wa kuigwa na wenye nidhamu katika jamii mara baada ya kuhitimu elimu yao.

Uchaguzi wa Serikali za Mitaa unatarajiwa kufanyika tarehe 27 Novemba, 2024  huku ukienda sambamba na kauli mbiu isemayo “Serikali za Mitaa, Sauti ya Wananchi, Jitokeze Kushiriki Uchaguzi”.