Washiriki 8 wapatiwa Motisha Kiasi cha Shilingi 400,000 kwa Kupata Alama Kuanzia 98 na Kuendelea.

Imewekwa: August 7th, 2022

Mkurugenzi Mtendaji wa Halmashauri ya Wilaya ya Bukombe Lutengano Mwalwiba ametoa motisha ya kiasi cha shilingi 400,000.00 kwa washiriki 8 waliopata alama kuanzia 98 na kuendelea ambapo kila mshiriki amepata kiasi cha shilingi 50,000 katika jaribio la kwanza  katika mafunzo wa Sensa ya Watu na Makazi 2022.

Motisha hiyo ameitoa tarehe 7 Agost, 2022 wakati alipotembelea na kuangalia maendeleo ya mafunzo hayo katika kituo cha shule ya sekondari Runzewe, Upendo katika Matendo Uyovu, Shule ya sekondari Bukombe na shule ya seminari wavulana Queen of Apostle iliyopo Ushirombo.

Vile vile amewataka washiriki hao kuhakikisha wanashiriki kikamilifu katika mafunzo hayo kwa kuwa Sensa ya mwaka 2022 ni Sensa ya kwanza kufanyika kwa njia ya Kidijitali.

" Hakikisheni mnashiriki kikamilifu mafunzo haya kwani Sensa ya mwaka 2022 itakuwa ni ya kidijitali na itatumia dodoso la kielektroniki litakalowekwa katika kishikwambi na kutumika kwa mahojiano ya ana kwa ana."

Aidha aliendelea kusema kuwa matumizi ya vishikwambi yataiwezesha serikali kuongeza ubora wa takwimu, kupunguza muda wa kuhesabu watu na kurahisisha utoaji huduma na matokeo baada ya kukamilika kwa zoezi la kuhesabu watu.

Hata hivyo amewataka washiriki hao watakapokuwa uwandani kuhakikisha wanakusanya taarifa ambazo zitaiwezesha serikali kutathimini Mipango ya Maendeleo ya Taifa.

Mafunzo ya Sensa ya watu na Makazi katika Halmashauri ya Wilaya ya Bukombe yalianza tarehe 31Julai, 2022 na yatakamilika tarehe 18 Agosti, 2022.

"SENSA KWA MAENDELEO, JIANDAE KUHESABIWA."