"Uchaguzi hausimamishi shughuli za Maendeleo" DC Nkumba

Imewekwa: August 21st, 2020

Mkuu wa Wilaya Mhe.Said Nkumba amewaambia viongozi wa vijiji na kata kuhakikisha wanawashirikisha wananchi kushiriki kwenye ujenzi wa miundombinu ya shule kipindi hiki cha uchaguni kwani uchaguzi  hausimamishi shughuli za maendeleo.

"Uchaguzi hausimamishi shughuli za maendeleo hakikisheni mnafanya kazi"

Nkumba ameyasema hayo tarehe 19 Agosti, 2020 wakati wa ziara yake ya uhamasishaji wa shughuli za maendeleo katika shule ya sekondari Bukombe iliyopokea kiasi cha shilingi milioni 226,600,000/=, Businda shilingi milioni 67,700,000/= na shule ya msingi shikizi ya Isabilo shilingi milioni 40,000,000/=.

Aidha Nkumba amewaagiza viongozi wa ulinzi na usalama wa kata kuhakikisha wanawachukulia hatua kali wale wote wanaogoma kushiriki katika shughuli za maendeleo.viburi 

"Kunawatu wanaviburi hawataki kushiriki shughuli za maendeleo Mkuu wa Kituo cha Polisi, Mtendaji wa Kata na Sungusungu hakikisheni mnawachukulia hatua"

Afisa elimu kata ya Bulega Majaliwa Mpemba amemuahakikishia Mkuu wa Wilaya kuwa watawahamasisha wananchi na kusimamia vizuri ujenzi wa miundombinu ya shule kwasababu wanauzoefu wa kutosha na watahakikisha fedha zinabaki kwa ajili ya kuanzisha miradi mwingine.

“Nikuhakikishie kwamba tutawahamasisha wananchi na kusimamia miradi, tutahakikisha tunasimamia vizuri na fedha zitabaki na zitaanzisha miradi mingine.”

Isack Traifon mwananchi wa kata ya Bukombe kwa niaba ya wananchi amemshukuru Serikali ya awamu ya tano  kwa kuwapatia fedha.

"Tunaishukuru sana Serikali ya Awamu ya Tano kwa kutupatia fedha, tunaahidi kutoa ushirikiano wakutosha kwasababu tunania ya kuboresha miundombinu ya shule."

Kwa mwaka wa fedha 2020/2021 Idara ya Elimu Sekondari ilipokea kiasi cha shilingi Millioni 294,300,000/= na Idara ya Elimu Msingi ilipokea kiasi cha shilingi Milioni 720,000,000/= kwa ajili ya ujenzi  wa miundombinu ya shule Wilayani Bukombe.