NENDENI MKAFANYE MAGEUZI MAKUBWA KWENYE SEKTA YA MIFUGO-DC MURAGILI.

Imewekwa: June 24th, 2025

Mkuu wa Wilaya ya Bukombe Mhe. Paskasi Muragili amewataka Maafisa Mifugo wa Halmashauri ya Wilaya ya Bukombe kuhakikisha wanafanya mageuzi makubwa ili waweze kuleta tija kwenye Sekta ya Kilimo.

Rai hiyo ameitoa leo tarehe 24 Juni, 2025 wakati wa hafla fupi ya kukabidhi pikipiki 11 kwa Maafisa Mifugo ngazi ya Kata kwa ajili ya kuwawezesha kusimamia na kuratibu Chanjo mbalimbali zinatotolewa kwa mifugo.

“Pikipiki hizi ziwe chachu katika utendaji kazi wenu na mkazitumie kwa malengo yaliyokusudiwa ili muweze kuwafikia wafugaji wengi”.

Aidha Muragili amesema kuwa tunakwenda kwenye zoezi la chanjo ya Mifugo kwa Nchi nzima hivyo pikipiki hizo zitumike vizuri kipindi ambacho zoezi hilo litakapoanza na zitunzwe vizuri ili ziweze kudumu kwa muda mrefu.

Kwa upande wake Mkuu wa Idara ya Kilimo, Mifugo na Uvuvi, Zedekiah Ossano ameishukuru Serikali ya awamu ya sita kwa kuimarisha Sekta ya Mifugo kwa kuwapatia vitendea kazi ambavyo vitaenda kuimarisha utendaji kazi.