MKUTANO WA BARAZA LA MADIWANI KUJADILI HOJA ZA MDHIBITI NA MKAGUZI WA HESABU ZA SERIKALI

Imewekwa: June 16th, 2025

Halmashauri ya Wilaya ya Bukombe imepongezwa kwa kupata Hati Safi katika Ukaguzi wa fedha wa mwaka 2023/2024 na kupelekea kupata hati safi kwa miaka mitatu mfululizo kuanzia mwaka 2021/2022 hadi 2023/2024.

Pongezi hizo zimetolewa leo tarehe 16 Juni, 2025 na Mhe. Sakina Mohamed ambaye ni Kaimu Mkuu wa Mkoa wa Geita katika Mkutano maalum wa Baraza la kupokea na kujadili hoja za Mdhibiti na Mkaguzi wa Hesabu za Serikali (CAG) uliofanyika katika ukumbi wa Mikutano wa Halmashauri.

“Twendeni tukasimamie vizuri fedha za Miradi ya Maendeleo na tuhakikishe tunakabidhi nyaraka zote muhimu kwa mkaguzi wa ndani ili tuweze kufunga hoja zilizobaki na tuepuke kuongeza hoja nyingine “ amesisitiza Sakina.

Kwa upande wake Mkaguzi Mkuu  wa Mkoa wa Geita (Chief External Auditor) Bw. Waziri Shabani wakati akiwasilisha ripoti ya mwaka wa fedha 2023/2024 amesema kuwa jumla ya hoja 14 sawa 49% bado hazijatekelezwa na hoja 18 sawa na 56% zimetekelezwa kikamilifu .

Aidha amesema kuwa kulikuwa maagizo 10 kutoka Kamati ya Kudumu ya Hesabu za Serikali za Mitaa (LAAC) ambapo maagizo 4 yametekelezwa kikamilifu, agizo 1 halijaanza kutekelezwa na maagizo 5 yapo katika hatua mbalimbali za utekelezaji.