MAJENGO YA KUTOLEA HUDUMA KWA WANYAMA YAZINDULIWA BUKOMBE.

Imewekwa: March 8th, 2024

Waziri wa Kilimo Umwagiliaji, Maliasili na Mifugo wa Serikali ya Mapinduzi ya Zanzibar amezindua mradi wa majengo ya kutolea huduma za maabara, chanjo na upasuaji kwa wanyama yanayojengwa na  shirika lisilo la kiserikali la Tanzania Humane Charity (TAHUCHA) tarehe 7 March, 2024 Wilayani Bukombe huku akiwapongeza kwa kuanzisha huduma hiyo muhimu kwa ajili ya ustawi wa wanyama.

"Hongereni sana TAHUCHA kwa kuanzinzisha mradi huu ambao utatoa tiba za kibingwa kwa wanyama na kuinua kipato kwa wafugaji pamoja na kuongeza uzalishaji maradufu."

Aidha aliendelea kusema kuwa uanzishwaji wa mradi huu Wilayani Bukombe ni utekelezaji wa Ilani ya Chama Cha Mapinduzi.

Kwa upande wake Mkuu wa Mkoa wa Geita Martine Shigella alisema uanzishwaji wa kituo hiki ni mapinduzi makubwa sana katika sekta ya mifugo na ameahidi kuwapa ushirikiano kwa kuhakikisha mradi unaendelea.

"Sisi kama Mkoa tupo tayari kutoa ushirikiano kwa kuhakikisha TAHUCHA inaendelea kutoa huduma za  kibingwa za kitabibu katika mkoa wetu."

Vilevile amewataka wananchi kukitumia kituo cha TAHUCHA kwa ajili ya ustawi wa afya za wanyama na binadamu.

Akiwasilisha taarifa ya mradi Mratibu wa Mradi Richard Patrick Itaba amesema Wilaya ya Bukombe ina idadi kubwa ya mifugo na uhitaji wa huduma za ugani zimepanuka na hivyo vinahitajika vituo vingi kama hiki.

Itaga ameiomba Serikali kuisaidia TAHUCHA vifaa tiba,majengo ya Madaktari wa kujitolea na wale wa Mafunzo kwa vitendo. 

Mradi wa utoaji huduma za afya na ustawi wa wanyama ulianza mwaka 2021kwa awamu ya kwanza kwa kununua eneo lenye ukubwa wa ekari tatu na kujenga miundombinu ya awali na kuanza kutoa huduma za ugani.