DC MURAGILI AWATAKA WANANCHI KUZINGATIA KANUNI ZA AFYA

Imewekwa: May 16th, 2024

Mkuu wa Wilaya ya Bukombe  Mhandisi Paskasi Damian Muragili amewataka wananchi wa Wilaya ya Bukombe kuhakikisha wanazingatia kanuni za afya ili kukabiliana na magonjwa ya mlipuko.

" Ili kujikinga na magonjwa ya mlipuko kama vile Kuhara, kipindupindu na kuumwa tumbo ni lazima tuyaweke mazingira yetu katika hali ya usafi."

Muragili ameyasema hayo tarehe 15 Mei, 2024 wakati  akiongea na wananchi wa kata ya Katente kitongoji cha Bwenda.

Aidha amemuagiza Mkurugenzi Mtendaji wa Halmashauri ya Wilaya ya Bukombe kuhakikisha anakamilisha ujenzi wa  Kituo cha Afya Bwenda ili kianze kutoa huduma.

"Tuhakikishe tunakamilisha kituo chetu cha afya ili kuwapunguzia adha wananchi ya kutembea umbali mrefu kwa ajili ya kupata huduma za afya."

Vile vile ameupongeza uongozi wa kata ya katente kwa usimamizi mzuri wa ujenzi wa Maabara na vyumba vitatu vya madarasa.

"Ungozi wa kata hongereni sana kwani mmezitendea haki fedha za Mhe.Rais. Niwaombe Walimu kusimamia utunzaji wa miundombinu hii ili iweze kudumu kwa muda mrefu."

Kwa upande wake Mwenyekiti wa CCM Wilaya ya Bukombe, Matondo Kihanga Lutonja ameupongeza uongozi wa kata ya Katente kwa kusimamia vizuri miradi ya maendeleo.

" Miradi yetu imekamilika kwa viwango ambavyo Serikali imekusudia kwa kufanya hivyo mmeitendea haki ilani ya chama chetu."

Ziara ya Mkuu wa Wilaya katika kata ya Katente ni muendelezo wa ziara yake katika kata mbalimbali ya kutatua kero za wananchi na kukagua miradi ya maendeleo.