“Wekeni mipango kabambe ya ulinzi wa hifadhi ya misitu katika vijiji na kata zetu”

Imewekwa: April 20th, 2018

Mkuu wa Wilaya ya Bukombe Mhe.Josephat Maganga   amewasihi wananchi wote kuzingatia na kuheshimu sheria zinazosimamia na kulinda misitu kwa manufaa ya wananchi katika Maadhimisho ya siku ya upandaji miti yaliyoadhimishwa leo Kata ya Uyovu kijiji cha Uyovu.

Katika maadhimisho hayo Mkuu wa wilaya amewakumbusha wananchi kuwa misitu ni uhai, mahitaji mengi muhimu katika maisha ya kila siku yanategemea misitu kwa njia moja au nyingine.

“Sisi sote tunahitaji mkaa  na kuni maji kwa ajili ya matumizi ya nyumbani , tunahitaji pia miti ili kupata mbao za biashara, nguzo za umeme, dawa za mitishamba, ufugaji nyuki wenye kuleta zao la asali udongo wenye rutuba na hali ya hewa nzuri” alisema Maganga

Mhe Maganga ametoa wito kwa kila familia kuanzisha Bustani ndogo ndogo za miche ya miti ili kupanda mashambani, na kamati ya Ulinzi na Usalama katika ngazi zote zifanye Suala la Ulinzi wa misitu ya hifadhi kuwa agenda ya kudumu na kuainisha majukumu katika ngazi mbalimbali kwenye kulinda na kuondoa wavamizi wa misitu.

Wilaya ya Bukombe imezungukwa na misitu kwa asilimia 60 huku makazi ya wananchi yakiwa asilimia 40 tu, jambo ambalo linaleta matumaini ya kuwa Tanzania ya kijani inawezekana.

Mkuu wa Wilaya ya Bukombe Mhe.Josephat Maganga akiongea Na Wananchi baada ya kumaliza kupanda mti.

Afisa Kilimo na Umwangiliaji wa Wilaya akimwangilia Mti Baada ya kupanda katika Maadhimisho ya upandaji miti.

Afisa Tarafa wa Siloka John Tumbo akinawa mikono katika Mti aliopanda katika maadhimisho.

Afisa Mazingira akipanda mti siku ya Maadhimisho yeye kama msimamizi wa Mazingira ikiwemo miti.

Mwananchi wa kata ya Uyovu nae akipanda mti  kuashiria Tanzania ya kijani inawezekana.

Mkuu wa Wilaya ya Bukombe Mhe.Josephat Maganga akigawa mashina ya miti kwa Wananchi wa Kata ya Uyovu kama mbegu ya kutengeneza Tanzania ya Viwanda.