Washiriki wa Mafunzo ya Sensa ya Watu na Makazi 2022 Kuhakikisha wanafuatilia mafunzo kwa Umakini

Imewekwa: August 4th, 2022

Mkuu wa Wilaya ya Bukombe Mhe. Said  Nkumba amewataka washiriki wa Mafunzo ya Sensa ya watu na Makazi 2022 kuhakikisha wanafuatilia mafunzo hayo kwa umakini mkubwa ili nchi iweze kupata takwimu za msingi.

"Hakikisheni mnafuatilia mafunzo haya kwa umakini mkubwa kwani taarifa za idadi ya watu wote kwenye nchi, umri, jinsi, hali zao za elimu, ajira, mahali anapoishi  zitaisaidia serikali kufuatilia na kutathimini Mipango ya Maendeleo ya Taifa.

Hayo ameyasema tarehe 3 Agost, 2022 wakati alipotembelea vituo vya mafunzo kwa niaba ya kamati ya Sensa ya Wilaya. Vituo hivyo ni pamoja na shule ya sekondari Bukombe, shule ya seminari Queen of Apostle, shule ya sekondari Runzewe na kichuo cha Upendo katika Matendo Uyovu.

Aidha amewataka washiriki kuvitunza na kuvitumia vizuri vifaa walivyopewa wakati wa mafunzo hayo.

"Hivi vishikwambi mlivyopewa hakikisheni mnavitunza na kuvitumia vizuri na vitumike kwa mujibu wa Sensa tu. Mtu yoyote atakae vitumia kwa matakwa yake  hatua kali za kisheria zitachukuliwa dhidi yake."

Naye Mshiriki wa mafunzo hayo Ramadhani Mng'oi akitoa shukrani kwa kwa niaba ya washiriki wa mafunzo ya sensa alisema kuwa wapo tayari kusikiliza mafunzo kwa umakini na amemuhaidi Mkuu wa Wilaya kuwa watakapoenda kukusanya taarifa  hizo watafanya kazi hiyo kwa umakini na uafilifu mkubwa ili kupata taarifa sahihi za kila mwanakaya kwa ajili ya maendeleo ya Taifa.

Halmashauri ya Wilaya ya Bukombe ina jumla ya washiriki 783. Makalani 696, Wasimamizi wa Maudhui 70 na TEHAMA 17.

"SENSA KWA MAENDELEO, JIANDAE KUHESABIWA."