KITUO CHA AFYA NAMONGE CHA KABIDHIWA GARI LA WAGONJWA

Imewekwa: October 8th, 2025

Kituo cha Afya Namonge kimekabidhiwa gari jipya la wagonjwa (Ambulance) lenye namba za usajili STM 7766 ambalo litasaidia kutoa huduma za afya kwa wananchi pamoja na kuokoa maisha ya wananchi wa Kata ya Namonge.

Akiongea katika hafla ya kukabidhi gari la wagonjwa leo tarehe 8October, 2025 Mhe. Mhandisi Paskasi Muragili amesema kuwa kutolewa kwa gari hili kutasaidia kuondoa kero kwa wananchi wa kata ya Namonge na Kata za jirani wanaopata changamoto ya usafiri pindi wagonjwa wanapopewa rufaa kwenda hospital ya Wilaya.

Aidha Mhe.Muragili amempongeza Rais wa Jamhuri ya Muungano wa Tanzania Dkt. Samia Suluhu Hassan kwa mchango wake mkubwa wa kuwaletea  wananchi maendeleo.

"Kwa mwaka wa fedha 2025/2026 tumekwishapokea kiasi cha shilingi  Bilioni 1.2 kwa ajili ya ukamilishaji, ujenzi na upanuzi wa miundombinu ya sekta ya Afya katika halmashauri ya Wilaya ya Bukombe. Ambapo kiasi cha shilingi Milioni 60 ni kwa ajili ya ukamilishaji wa Zahanati ya Busonzo, Milioni 60 ukamilishaji wa Zahanati ya Ilyamchele, Milioni 60  ukamilishaji wa Zahanati ya Nasihukulu, Milioni 60 ukamilishaji wa  Zahanati ya Imalanguzu, Milioni 689.9 ujenzi wa kituo cha Afya  Msangira, Milioni 250 upanuzi wa Zahanati ya Nampalahala kuwa kituo cha Afya na Milioni 23.8 upanuzi wa jengo la kujifungulia kituo cha Afya Bulega."

Naye Mganga Mfawidhi wa kituo cha Afya Namonge Dr. Ezekiel Mollel  amesema kuwa kuletewa gari jipya la wagonjwa kutasaidia kupeleka huduma karibu na wananchi pamoja na kuokoa maisha ya Wananamonge.

Kwa upande wake Mkurugenzi Mtendaji wa Halmashauri ya Wilaya ya Bukombe Bi. Adelina Mfikwa amewapongeza watumishi wa Divisheni ya afya kwa kazi kubwa wanayoifanya ya kutoa huduma bora kwa wananchi na amewataka kuhakikisha wanalitunza gari hilo ili liweze kudumu kwa muda mrefu.

Kituo cha Afya Namonge kilianza kutoa huduma mnamo mwaka 2021 na kinahudumia jumla ya vijiji 8 vya kata ya Namonge.