Wanawake kuanzisha Kiwanda cha uchakataji mihogo Wilaya ya Bukombe

Imewekwa: March 8th, 2018

Mkuu wa mkoa wa Geita mhandisi Robert Gabriel ametoa hati ya uzinduzi kwa kikundi cha Saccos ya kina mama,na kuendesha harambee  ndogo ya kuanzisha kiwanda cha uchakataji Mihogo kwa Jukwaa la Wanawake Kiuchumi,ambapo amechangia kiasi cha Tsh.500,000/= na kuungwa mkono  na Mbunge wa Jimbo la Bukombe,Naibu Waziri wa Madini mhe.Dotto Biteko ambaye pia amechangia Tsh.500,000/=,pamoja na Viongozi mbalimbali wa Serikali na vyama vya siasa katika maadhimisho ya Siku ya Wanawake Duniani yaliyofanyika wilayani Bukombe.

Katika Maadhimisho hayo Mkuu wa Mkoa amewaagiza wakurugenzi wote  wa Halmashauri za mkoa  wa Geita kuhakikisha wanatenga fedha kwa ajili  ya vikundi  vya wanawake(4%), vijana(4%) na watu wenye ulemavu (2%) ili wajikwamue kiuchumi kwa kushiriki katika shughuli mbalimbali za uzalishaji mali  ili kuongeza kipato.

Mhandisi Robert Gabriel amesema serikali ya awamu ya tano  ina lenga kuhakikisha Tanzania inakua nchi ya uchumi wa viwanda  “Wanawake wanamchango mkubwa katika  harakati za kuchochea ukuaji  wa uchumi ndani ya nchi  kupitia vikundi vya kiuchumi kama VICOBA na shughuli mbalimbali za kiuchumi kama vile  uchakataji wa malighafi  na kuongeza thamani ,ufugaji; kilimo cha bustani na matunda” amesema Mhandisi Robert

Maneno haya ya Mkuu wa Mkoa yanaenda sambamba kabisa na kauli mbiu ya mwaka huu inayosema Kuelekea Uchumi wa Viwanda “Tuimarishe usawa wa jinsia na uwezeshaji wanawake vijijini.

Pia amezitaka  halmashauri kutambua  vikundi vya wanawake  na vijana  vyenye mwelekeo  wa viwanda  na kukuzalisha  malighafi kwa  ajili ya kulisha viwanda  vidogo  na vya kati ili vijengwe  uwezo kifedha , mafunzo na vifaa ili vichangie azma ya serikali.

Mkuu wa mkoa ametoa wito kwa jamii kuwalinda wanawake,wasichana dhidi ya vitendo vya ukatili  kimwili kama  vipigo, ubakaji, ndoa za utotoni na kuwarubuni kimapenzi hivyo kupelekea kukatisha ndoto zao za kujiendeleza kiuchumi, na kurudisha  nyuma maendeleo ya kiuchumi  katika ngazi ya kaya  na taifa.

Mwenyekiti wa Saccos Iliyozinduliwa Na Mkuu wa Mkoa wa Geita Mhandisi Robert Gabriel akipokea Hati ya Uzinduzi wa Saccos Hiyo.

Mwenyekiti wa Jukwaa la Wanawake Wilayani Bukombe Bi.Leticia Akisoma Risala Wakati wa Maadhimisho ya Siku ya Wanawake Duniani.

Mkuu wa Mkoa wa Geita Mhandisi Robert Gabriel Akitembelea wajasiliamali Wanawake Katika Maadhimisho ya Siku ya Wanawake Duniani

Mbunge wa Jimbo la Bukombe Mhe.Dotto Biteko akitoa Tsh .500,000/= Katika Harambee ya Uanzishaji wa Kiwanda cha Uchakataji Mihogo Kwa Jukwaa la Wanawake Bukombe.

Mkuu wa Mkoa wa Geita mhandisi Robert Gabriel akimlisha Kipande Cha Keki Mwenyekiti wa Chama CCM Wilaya ya Mbogwe Bi Johari Juma Baada ya Kuchangia Harambee ya Uanzishaji wa Kiwanda cha Uchakataji Mihogo.

Mkuu wa Wilaya ya Bukombe Mhe.Josephata Maganga akichangia Harambee Ndogo ya Kuchangia Uanzishwaji wa Kiwanda cha Uchakataji Mihogo.

Maandamano ya Wanawake katika Maadhimisho ya Siku ya Wanawake Duniani Leo Machi 8,2018 Wilayani Bukombe.