Bukombe yapitisha rasimu ya mpango wa bajeti 2019/2020

Imewekwa: February 21st, 2019

Kwa mwaka wa fedha  2019/2020  baraza maalumu la madiwani katika Halmashauri ya Wilaya ya Bukombe limepitisha rasimu ya mpango wa bajeti  yenye jumla ya Tshs 32,720,162,547.99 kutoka katika vyanzo mbalimbali kwa mchanganuo ufuatao:- Mapato ya ndani Tshs. 1,990,902,999.99, Ruzuku kutoka serikali 26,896,279,461.00 na Miradi yamaendeleo (Ruzuku na Nguvu za Jamii) Tshs. 3,832,980,087.00 katika ukumbi wa mikutano wa Halmashauri tarehe 20 Februari, 2019.

Akisoma rasimu hiyo ya bajeti Afisa mipango wa Wilaya Sarah Yohana kwa niaba ya Mkurugenzi mtendaji alisema kwa mujibu wa sheria namba 9 ya mwaka 1982 ya serikali za Mitaa kifungu cha 43 (1) kila Mamlaka ya Serikali za Mitaa, inatakiwa kuandaa na kupitisha bajeti ya mapato na matumizi kwa muda usiopungua miezi miwili kabla ya kuanza kwa mwaka wa fedha.

Sarah alisema  uandaaji wa bajeti hiyo umezingatia mwongozo wa bajeti uliotolewa na serikali kupitia Wizara ya fedha, mahitaji muhimu ya Wilaya kulingana na mpango mkakati wa Halmashauri, utekelezaji wa Ilani ya Uchaguzi wa Chama Tawala, Mpango wa maendeleo Endelevu, Mpango wa Taifa wa Maendeleo wa Miaka Mitano II 2021, Dira ya Maendeleo ya Taifa hadi 2025 na maelekezo ya viongozi wa juu wa Serikali. 

Aidha aliendea kusema kuwa mikakati ya utekelezaji wa bajeti  hiyo ni pamoja na kuendeleza matumizi ya mifumo ya kieletroniki  (POS) katika ukusanyaji wa vyanzo vya ndani vya mapato vya Halmashauri kama vile masoko, vituo vya kutolea huduma za afya, minada na maegesho, kuimarisha ukusanyaji wa mapato ya ndani kwa vyanzo vilivyopo na kuendeleza kubuni vyanzo vingine ili kuimarisha mapato ya Halmashauri, kuendeleza kuibua vyanzo vipya ambavyo havitegemei hali ya hewa na vinavyohitaji gharama kidogo za ukusanyaji kama vile mgodi, maduka ya madawa ya binadamu, mialo ya wachenjuaji wa dhahabu, ushuru wa madini ya ujezi kama vile kokoto, mawe na mchanga pamoja na tozo na adhabu na kuendelea kutoa mafunzo mbalimbali ambayo yataboresha utekelezaji wa bajeti.

Mwenyekiti wa Halmashauri ya Wilaya ya Bukombe Safari Mayala aliwataka waheshimiwa madiwani kupitia mapendekezo ya bajeti kwa umakini na kuzingatia vipaumbele vya Halmashauri ili iwe  dira ya kutatua changamoto zinazowakabili wananchi.

Kikao cha kupitisha rasimu ya mapendekezo ya bajeti kilikuwa cha siku mbili ambapo siku ya kwanza ilikuwa ni mapitio ya utekelezaji wa mpango wa bajeti kwa mwaka wa fedha 2018/2019 kuishia 31 Desemba , 2018 na siku ya pili ilikuwa ni kupitia  makisio ya mapato na matumizi ya mpango wa maendeleo wa Halmashauri kwa mwaka wa Fedha 2019/2020.